Значныя Дні

Пастаноўка пытання, асэнсаванне страху, сутыкненне з уявай Іншага. Умоўнасць і фарс закручанай прасторы, дзе людзі, як у люстрах, адбіваюцца і люструюцца. Кароткія спробы выказвання, маўленне насуперак вызначаным нормам, хібы і пошук свайго голасу. Гратэскны кот Грыпміна, які некалькі гадоў гойсае каля станцыі Беларусь у Заслаўі і раптам упэўнена скіроўвае шлях да грамадскай прыбіральні. Далей — бяда, смутак, і ўсё па коле. Пастаноўка пытання: ці можна даць дакладны адказ? Камедыя пра моладзь і не толькі, пра трывогі і побыт, пра страхі і надзеі.

Цэнтральны пункт на мапе рамана — чыгуначная станцыя Беларусь. Тут, у будзённай прыбіральні, пераплятаюцца рэальнае з фантазійным, рэалізм з сюррэалізмам, грубы натуралізм з алюзіямі і гратэскам. Няправільная мова і зменлівы тэмп. Напаўпрывідныя персанажы, вобразы-словы, «закадравы» каментатар, што дадае іроніі ды гульні. Малюнкі і фота — не проста ілюстрацыі, а паўнапраўныя часткі тэксту.

Раман Цімура Кудзеліча — для тых, хто цэніць літаратурныя эксперыменты, сучасную беларускую прозу, авангард, мастацкія ідэйныя пошукі і нестандартныя формы. Гэта гісторыя пра стан беларускай душы, пра страхі, рутыну, пра шчаслівыя і ржавыя дні, значныя для кожнага.

Асноўныя словы: сучасная беларуская літаратура, раман, авангард, чыгуначная станцыя Беларусь, Цімур Кудзеліч, філасофія, рэалізм, сюррэалізм, літаратурныя эксперыменты.